जैन इरिगेशनचा वार्षिक एकत्रित नफा ९१ कोटी
कंपनीच्या एकत्रित महसुलात ७ टक्क्यांची वाढ
krushisewak
जळगाव (प्रतिनिधी) - देशातील सर्वात मोठी सिंचन प्रणाली कंपनी जैन इरीगेशन सिस्टिम्स लिमिटेडने ३१ मार्च २०२४ रोजी समाप्त होणाऱ्या तिमाही आणि वर्ष अखेरीचे स्टॅण्डअलोन आणि कन्सोलिडेटेड आर्थिक निकाल जाहीर केले. यात कंपनीच्या कन्सोलिडेटेड वार्षिक विक्रीत ७ टक्क्यांची वाढ व नफा ९१ कोटी रुपये झाला आहे. जळगाव येथे झालेल्या संचालक मंडळाच्या बैठकीत आर्थिक निकाल मंजूर करण्यात आले.
आर्थिक निकालाची वैशिष्ट्येः
*वार्षिक आधारावर आर्थिक वर्ष २०२३-२४ चा ७.० टक्क्यांनी विक्री वाढ. *वार्षिक आधारावर २०२४ वर्षाचा कन्सोलिडेटेड एबिटा (EBITDA) १६.८ % वाढला. *चालू आर्थिक वर्षात एकत्रित कर पश्चात नफा हा ९१ कोटी रुपयांचा दिसतो, गत वर्षांची तुलना केली असता १२०.८ कोटी रुपये इतका तोटा होता. *वार्षिक आधारावर २०२४ वर्षाचे स्टॅण्डअलोन एबिटा १०.३ टक्क्यांनी वाढला. *वार्षिक आधारावर आर्थिक वर्ष २०२३-२४ साठी स्टॅण्डअलोन निव्वळ नफा ४१.२ टक्क्यांनी वाढून तो ₹५५.५ कोटी झाला.
१९२५ कोटींच्या ऑर्डर
सध्या कंपनीच्या हातात एकत्रित आधारावर १९२५ रुपये कोटीच्या ऑर्डर्स आहेत. ज्यामध्ये हाय-टेक ऍग्री इनपुट उत्पादन व्यवसायाच्या ३८३ कोटी रुपयांच्या, प्लास्टिक विभागाच्या ४७१ कोटी आणि कृषी प्रक्रिया (ऍग्रो प्रोसेसिंग) विभागाच्या १०७१ कोटी रुपयांच्या ऑर्डर्स समाविष्ट आहेत.
"हवामान बदलाला भारतासह संपूर्ण जग सामोरे जात असून कृषी क्षेत्रात अनेक आव्हाने आहेत. मूल्यवर्धित शेती करणाऱ्या शेतकऱ्यांना याचा फटका बसत आहे. या आव्हानांना सामोरे जात कंपनीने किरकोळ व्यवसायात २५ टक्क्यांची भरीव वाढ केली आहे. कंपनीने प्रकल्प-आधारित व्यवसाय धोरणात्मकरित्या कमी केला आणि किरकोळ आणि निर्यात बाजारांवर लक्ष केंद्रीत केले ज्यामुळे चांगला नफा मिळाला. व्यवसायाच्या गुणवत्तेवर लक्ष केंद्रित करीत किरकोळ व्यवसाय वाढवून नफा सुधारण्यासाठी आम्ही वचनबद्ध आहोत.”
-अनिल जैन, उपाध्यक्ष तथा व्यवस्थापकीय संचालक, जैन इरिगेशन सिस्टीम्स लि. जळगाव
