रावेर लोकसभा निवडणूक : एकनाथराव खडसे खरंच निवडणूक लढवतील की सुनेच्या उमेदवारीसाठी भाजपवर दबावतंत्राचा वापर ?

भाजपच्या खासदार रक्षा खडसे या सध्या रावेर लोकसभा मतदार संघाच्या विद्यमान खासदार आहेत. २०१४ व २०१९ अशा सलग दोन निवडणुकीत श्रीमती खडसे यांनी विजय मिळवला आहे. या मतदार संघातून श्रीमती खडसे यांनी २०१४ मध्ये राष्ट्रवादीचे उमेदवार मनीष जैन यांचा पराभव केला होता. यावेळी रावेर लोकसभा मतदार संघाची जागा राष्ट्रवादीला सोडण्यात आल्याने काँग्रेसचे माजी खासदार डॉ उल्हास पाटील यांनी अपक्ष निवडणुक लढवली होती. मात्र त्यात त्यांचा पराभव झाला होता. तर २०१९ मध्ये भाजपतर्फे रक्षा खडसे यांच्यावर पक्षाने विश्वास दाखवत पुन्हा त्यांना उमेदवारी दिली होती.  त्यावेळी आघाडीची ही जागा काँग्रेसला सोडण्यात आल्याने रक्षा खडसे विरूद्ध डॉ उल्हास पाटील अशी लढत झाली होती. त्यात खडसे यांचा विजय झाला होता. मात्र त्यावेळी रक्षा खडसे यांचे सासरे व माजी मंत्री एकनाथराव खडसे हे भाजपमध्ये होते. त्यांची मोठी शक्ती सून रक्षा खडसे यांच्या विजयासाठी कामी आली होती. मात्र आता माजी मंत्री खडसे यांनी भाजपची वाट सोडून राष्ट्रवादीत प्रवेश केला आहे. त्यामुळे खडसे यांची भूमिका यावेळी निर्णायक ठरणार आहे. तर भाजपतर्फे येणाऱ्या लोकसभा निवडणुकीत पुन्हा एकदा रक्षा खडसे यांच्यावर विश्वास दाखवत त्यांना उमेदवारी दिली जाते की त्यांच्या ऐवजी नवीन चेहऱ्याला संधी दिली जाते हे निवडणुकीवेळी दिसणार आहे. 

राष्ट्रवादीचे नेते व राष्ट्रीय अध्यक्ष शरद पवार यांच्या उपस्थितीत जळगाव येथे झालेल्या राष्ट्रवादीच्या मेळाव्यात प्रदेशाध्यक्ष जयंत पाटील यांनी रावेर लोकसभेची जबाबदारी एकनाथराव खडसे यांनी घ्यावी असे विधान केले होते. हाच धागा पकडून माजी मंत्री व सध्या राष्ट्रवादीचे नेते असलेल्या खडसे यांनी पक्षाने आदेश दिल्यास रावेर लोकसभेची निवडणूक लढवू असे सांगून राजकारणातील वातावरण गरम करून टाकले आहे. जर समजा राष्ट्रवादीने एकनाथराव खडसे यांना रावेर लोकसभा मतदार संघातून उमेदवारी दिली तर भाजप नेमकी कोणती राजकीय खेळी खेळणार याची या मतदार संघातील नागरिकांमध्ये उत्सुकता आहे. भाजपने तिसऱ्यांदा रक्षा खडसे यांना उमेदवारी दिली व राष्ट्रवादीतर्फे एकनाथराव खडसे उमेदवार असल्यास सासरे विरूद्ध सून अशी लढत होण्याची शक्यता आहे. मात्र भाजप अशी खेळी खेळणार नाही. रक्षा खडसे यांच्या ऐवजी भाजप एकनाथराव खडसे यांचे कट्टर विरोधक व राज्याचे ग्रामविकास मंत्री गिरीश महाजन यांना खडसे यांच्या विरोधात रिंगणात उतरवण्याची शक्यता नाकारता येत नाही. मात्र महाजन केंद्रात जाण्यास फारसे उत्सुक नाहीत. परंतु अशा परिस्थितीत पक्षाने आदेश दिल्यास त्यांना नाकारता येणार नाही. तर भाजपतर्फे माजी खासदार स्व हरिभाऊ जावळे यांचे सुपुत्र अमोल जावळे, पक्षाचे लोकसभा क्षेत्र प्रमुख नंदकिशोर महाजन हे पदाधिकारी या निवडणुकीसाठी इच्छुक आहेत. दरम्यान, भाजपने रक्षा खडसे यांना उमेदवारी द्यावी यासाठी भाजपवर दबाव निर्माण करण्यासाठी राष्ट्रवादीच्या उमेदवारीच्या माध्यमातून गुगली टाकण्याचा एकनाथराव खडसे यांचा हा प्रयत्न असावा अशीही चर्चा मतदारांमध्ये आहे. ही माजी मंत्री खडसे यांची राजकीय खेळी असू शकते. कारण खडसे यांनी राष्ट्रवादीत प्रवेश केल्यावर ते काही महिन्यांपूर्वीच विधान परिषदेवर निवडून आलेले आहेत. त्यांचा किमान पाच वर्षांचा कालावधी बाकी आहे. त्यामुळे ते लोकसभा निवडणुकीत उतरण्याची शक्यता जवळजवळ नसल्यासारखीच आहे. भाजपने रक्षा खडसे यांना उमेदवारी दिल्यास सून म्हणून एकनाथराव खडसे यांचा निवडणुकीत फारसा हस्तक्षेप व विरोध राहणार नाही असे काही जाणकारांचे मत आहे. याउलट ते सुनेच्या विजयासाठी अप्रत्यक्षरीत्या पडद्यामागून प्रयत्नच करतील असेही बोलले जात आहे. या जागेवर असाही दावा काँग्रसने केलेला असल्याने महाविकास आघाडीत ही जागा काँग्रेसला सुटू शकते. त्यामुळे राष्ट्रवादीकडून उमेदवारी देण्याचा प्रश्नच येत नाही. मात्र महाविकास आघाडी न झाल्यास परिस्थिती वेगळी राहू शकते. गेल्या दहा वर्षात रक्षा खडसे यांनी मतदार संघातील केंद्र सरकारच्या माध्यमातून अनेक प्रश्न सोडविण्याचा प्रामाणिकपणे प्रयत्न केलेला आहे ही त्यांच्यासाठी जमेची बाजू  आहे. मात्र रावेर लोकसभा मतदार संघाचे ठिकाण असलेल्या रावेर रेल्वे स्टेशनवर सुरू असलेला महानगरी एक्स्प्रेसचा बंद केलेला थांबा तसेच सचखंड एक्स्प्रेस, दानापुर-पुणे एक्स्प्रेस या गाड्यांना वर्षानुवर्षापासून प्रवाशांनी केलेल्या थांब्याच्या मागणीला रक्षा खडसे न्याय देवू शकल्या नाहीत याबद्दल मतदार संघातील असंख्य प्रवाशांची नाराजी आहे. तिसऱ्यांदा निवडणुक लढविण्यासाठी रक्षा खडसे यांनी पूर्व तयारी सुरू केली आहे.