ग्रामीण विद्यार्थ्यांसाठी वाकोदला कृषी महाविद्यालय सुरु करावे

जळगाव (प्रतिनिधी) :

वाकोद परिसरात कृषी महाविद्यालय (ॲग्रिकल्चर बिएस्सी) सुरू करून ग्रामीण भागातील विद्यार्थ्यांना शैक्षणिक व्यासपिठ उपलब्ध करून द्यावे, अशी सूचना माजी केंद्रीय कृषी मंत्री खासदार शरद पवार यांनी जैन इरिगेशनचे अध्यक्ष अशोक जैन यांना केली आहे. वाकोद येथील कृषी तंत्र निकेतनला पवार यांनी भेट देत तेथे राबविल्या जाणाऱ्या विविध उपक्रमांची माहिती जाणून घेतली. 

जैन इरिगेशनचे संस्थापक अध्यक्ष भवरलाल जैन यांची जन्मभूमी असलेल्या वाकोद येथील गौराई कृषी तंत्र निकेतन व कृषीतंत्र विद्यालयाला आज (बुधवारी) माजी केंद्रीय कृषी मंत्री शरद पवार यांनी भेट दिली. यावेळी जैन इरिगेशनचे अध्यक्ष अशोक जैन, सहव्यवस्थापकीय संचालक अतुल जैन यांनी शरद पवार यांचे स्वागत करून संस्थेच्या विविध उपक्रमांची माहिती दिली. यावेळी माजी आरोग्यमंत्री राजेश टोपे, माजी खा. जयसिंगराव गायकवाड उपस्थित होते. कृषी महाविद्यालयाचे प्राचार्य देवेंद्र चौधरी, आशिष भिरूड, अजय काळे, जैन इरिगेशन सिस्टीमचे वरिष्ठ शास्त्रज्ञ डॉ अनिल ढाके, जैन फार्मचे व्यवस्थापक विनोदसिंह राजपूत यांनी कृषी शिक्षणास विद्यार्थ्यांचा चांगला प्रतिसाद असल्याचे सांगितले. ग्रामीण भागातील विद्यार्थ्यांची या तंत्रनिकेतनामुळे मोठी सोय झाल्याचे निदर्शनास आणुन दिले. कंपनीचे अध्यक्ष अशोक जैन यांनी वाकोदचा वटवृक्ष, वाघूरचे पाणी, मरुभुमीतुन बाहेर पडताना ही भवरलालजी जैन तथा मोठ्याभाऊंची पुस्तके पवार यांना यावेळी भेट दिली. 

भवरलाल ॲण्ड कांताबाई जैन फाऊंडेशनतर्फे गेल्या १३ वर्षांपासुन हे कृषी तंत्रनिकेतन चालविण्यात येत आहे. वाकोदच्या १०८  एकर परिसरात प्रात्यक्षिसह हे तंत्रनिकेतन विस्ताराले आहे. सातत्याने कायम अ श्रेणीत, कृषि क्षेत्रातील अग्रगण्य कंपन्यांचे   कॅम्पस , उच्चविद्याविभुषित प्राध्यापक वर्ग, सुसज्ज प्रयोगशाळा, सर्व सुविधायुक्त वसतीगृह, सुसज्ज ग्रंथालय व वाचनालय, बीएस्सी ॲग्रीची डीग्री पूर्ण करत असताना कृषि तंत्र पदविका अभ्यासक्रम देखील एकाच प्रक्षेत्रावर असलेली राज्यातील एकमेव संस्था आहे.