कर्जोद शिवारात पुरुषाचा मृतदेह आढळला : पोलिसांकडून ओळख पटविण्याचे काम सुरु

प्रतिनिधी/रावेर

रावेर तालुक्यातील कर्जोद शेती शिवारात एका अनोळखी पुरुषाचा मृतदेह आढळून आल्याने एकच खळबळ उडाली आहे. पोलिसांनी घटनास्थळी धाव घेवून मृतदेहाची पाहणी केली. याबाबत रावेर पोलीस स्टेशनला अकस्मात मृत्यूची नोंद करण्यात आली आहे.

 कर्जोद शेती शिवारातील सोनलाल प्रजापती यांच्या गट नं. २९० मधील शेताच्या बाजुला असलेल्या नाल्यात एका अनोळखी पुरुषाचा मृतदेह बुधवारी सकाळी नाल्यातील पाण्यात तरंगतांना व कुजलेल्या अवस्थेत आढळून आला आहे. या इसमाचा नाल्यातील पाण्यात बुडून मरण पावल्याचा अंदाज पोलिसांनी वर्तवला आहे. ३० ते ३५ वय, उंची ५ फुट, रंग सावळा, उजव्या पायात काळ्या रंगाची चप्पल, कमरेत काळा करदोडा, मेहंदी रंगाचा शर्ट, काळ्या रंगाची पँट अशा वर्णनाचा हा पुरुष असून हा मयत पुरुष नेमका कुठला याचा तपास पोलिसांतर्फे परिसरातील गावात घेतला जात आहे. याबाबत संतोष प्रजापती याने दिलेल्या फिर्यादीवरून रावेर पोलीस स्टेशनला अकस्मात मृत्यूची नोंद करण्यात आली आहे. पुढील तपास पोलीस निरीक्षक डॉ विशाल जयस्वाल यांच्या मार्गदर्शनाखाली उपनिरीक्षक तुषार पाटील करीत आहेत.