रावेर तालुक्यात गारांचा वर्षाव : वादळी वाऱ्यासह पाऊस : रावेर-सावदा रस्त्यावर झाड पडल्याने वाहतूक खंडित

प्रतिनिधी / रावेर 

रावेर तालुक्यात आज दुपारी चार वाजता वादळी वाऱ्यासह जोरदार पाऊस झाला. रावेर शहरासह परिसरातील काही गावांमध्ये हरबऱ्याच्या आकाराच्या गारांचा काही मिनिटे वर्षाव झाला. यामुळे नागरिकांची एकच धांदल उडाली. वादळामुळे केळी बागांची पाने फाटली असून काही अंशी नुकसान झाले आहे. नुकसानीची माहिती घेण्याचे काम यंत्रणेकडून सुरु असल्याचे तहसीलदार बी ए कापसे यांनी सांगितले. . पारशा नाल्याजवळ झाड रस्त्यावर पडल्याने वाहतूक खंडित झाली आहे. दोन तासापासून वीज पुरवठा खंडित झाला आहे.

गेल्या तीनचार दिवसापासून तापमानाचा पारा 45 अंशापर्यंत पोहचला होता. आज सकाळपासून उन्हाची तीव्रता कमी असल्याने वातावरणात काहीसा बदल झाला होता. दुपारी अचानक वादळी वाऱ्यासह शहर व परिसरात पावसाला सुरुवात झाली. पहिले तीनचार मिनिटे शहरात गारांचा तुफान वर्षाव झाला. वादळामुळे झाडांची पाने गळाल्याने स्टेशन रोडवर पालापाचोळा जमा झाला होता. चार वाजेपासून सुरु झालेला पाऊस साडेपाच वाजेपर्यंत सुरूच होता.

अजंदा, निंबोल, विटवा उटखेडा, भोर, भाटखेडा, पुनखेडा, पातोंडी परिसरात गारपीट झाल्याची माहिती मिळाली आहे. रावेर सावदा रस्त्यावर वादळामुळे निंबाचे झाड पडल्याने या रस्त्यावरील वाहतूक खंडित झाली आहे. आज हनुमान जयंतीनिमित्त मंदिरात कार्यक्रम असल्याने यात पावसामुळे व्यत्यय निर्माण झाला आहे. वादळामुळे केळी बागांची पाने फाटल्याची माहिती शेतकऱ्यांनी दिली. यामुळे काही अंशी केळी बागांचे नुकसान झाले आहे.