प्रभू श्रीरामलल्ला प्राणप्रतिष्ठा सोहळा : जैन इरिगेशनने जळगावात उभारली खान्देशातील सर्वात मोठी प्रतिमा

प्रतिनिधी /जळगाव  

अयोध्या येथे प्रभू श्रीरामलला प्राणप्रतिष्ठा सोहळ्यानिमित्त सर्वत्र आनंदोत्सव साजरा होत आहे. यापार्श्वभूमीवर भवरलाल अँड कांताबाई जैन फाऊंडेशन व जैन इरिगेशनतर्फे जळगाव शहरातील चौक व उद्यानांमध्ये प्रभु श्रीरामांचे प्रतिमांसह आकर्षक सजावट आणि रोषणाई करण्यात आली आहे. या सोहळ्यासाठी जैन इरिगेशनचे अध्यक्ष अशोक जैन निमंत्रीत असल्याने ते अयोध्याला रवाना झाले आहेत. 

प्रभू श्रीरामचंद्र यांच्याविषयी विशेष सजावट लालबहाद्दुर शास्त्री टॉवर, स्वातंत्र चौक, आकाशवाणी चौक, काव्यरत्नावली चौक येथे करण्यात येत आहे. यासह भाऊंचे उद्यान, महात्मा गांधी उद्यान, गौराई उद्यान याठिकाणी आकर्षक सजावट व रोषणाई करण्यात येणार आहे. यातून जळगावकरांना दिवाळीची अनुभूती होईल.

शास्त्री टॉवरवर ८० फुटाची प्रतिमा

श्रीरामलला प्राणप्रतिष्ठा सोहळ्यानिमित्त प्रभू श्रीरामांची भव्य अशी ८० फुट उंचीची प्रतिमा जळगाव शहराच्या मध्यभागी असलेल्या लालबहाद्दुर शास्त्री टॉवरवर साकारली आहे. ही प्रतिमा खान्देशातील सर्वात मोठी ठरली आहे. स्वातंत्र्य चौकात ३० फुट तर आकाशवाणी चौकात ४० फुटांचे प्रतिमा उभी करण्यात आली आहे.

५१ मंदिरांमध्ये भाविकांना प्रसाद 

जैन इरिगेशनतर्फे शहरातील ५१ मंदिरांमध्ये प्राणप्रतिष्ठा दिवशी दर्शनासाठी आलेल्या भाविकांना केळीचा प्रसाद दिला जाणार आहे. यासाठी शिवराज्याभिषेक लोकोत्सव समिती महाबळ उपनगर यांचे सहकार्य असेल. काव्यरत्नावली चौकामध्ये प्राणप्रतिष्ठा सोहळ्यानिमित्ताने प्रभू श्रीरामाची १६ फुट प्रतिमा व ५ फुटी दिव्यांनी रोषणाई केली आहे. विशेष सजावट करून प्रभू श्रीरामांचा आदर्श आपल्या जीवनात आचरणाचा संदेश दिला जाणार आहे. ही सजावट जैन इरिगेशनच्या कलाविभागातील सहकारी जगदीश चावला व सहकाऱ्यांनी साकारली आहे.

 १३ हजार सहकाऱ्यांना पेढे वाटप 

प्रभू श्रीराम प्राणप्रतिष्ठा सोहळ्याच्या निमित्ताने जैन इरिगेशन सिस्टीम्स लि. च्या १३ हजारहून अधिक सहकाऱ्यांना पेढे वाटप करण्यात येणार आहेत. प्रभू श्रीराम प्राण प्रतिष्ठेनिमित्त कांताई सभागृह येथे वाटप होणाऱ्या ‘स्नेहाच्या शिदोरी’ सोबत ड्रायफूट शिरा दिला जाणार आहे. 

अशोक जैन अयोध्येला रवाना…

श्रीराम मंदीर परिसरात प्राणप्रतिष्ठा सोहळा हा सात अधिवासांमध्ये होत आहे. देशातील जवळपास १२५ परंपरांचे संत-महापुरूष व भारतातील सर्व शाखीय २५०० श्रेष्ठ पुरूषांची उपस्थिती असणार आहे. या सोहळ्यासाठी जैन इरिगेशनचे अध्यक्ष अशोक जैन हेही निमंत्रीत आहेत. ते अयोध्याला रवाना झालेत. ते श्रीरामलला प्राणप्रतिष्ठा सोहळ्यामध्ये जळगाव जिल्ह्यातील ५० लाख भाविकांचे प्रतिनिधित्व करणार आहेत.