BREKING : माजी आमदार अरुण पाटील पुन्हा स्वगृही : मुबंईत प्रातिनिधिक स्वरूपात समर्थकांसह भाजपमध्ये पक्षप्रवेश

प्रतिनिधी/रावेर

रावेरचे राष्ट्रवादी काँग्रेसचे शरद पवार गटाचे माजी आमदार अरुण पाटील यांनी समर्थकांसह आज मुंबई येथील भाजपच्या प्रदेश कार्यालयात प्रदेशाध्यक्ष रवींद्र चव्हाण, जलसंपदा मंत्री गिरीश महाजन, आमदार अमोल जावळे व पक्षाच्या जेष्ठ पदाधिकाऱ्यांच्या उपस्थितीत भाजपमध्ये प्रवेश केला आहे. यामुळे रावेर तालुक्यात राष्ट्रवादी काँग्रेस शरद पवार गटाला खिंडार पडले आहे. 

माजी आमदार श्री पाटील यांनी 1995 व 2004 असे दोन वेळा भाजपचे रावेर विधानसभा मतदार संघांचे प्रतिनिधित्व केलेले आहे. मात्र त्यानंतर 2009 मध्ये त्यांनी काही कारणास्तव भाजप सोडत राष्ट्रवादी पक्षात प्रवेश केला होता. आज पुन्हा ते भाजपमध्ये प्रवेश करीत आहेत.

यावेळी जिल्हा परिषदेच्या शिक्षण व आरोग्य समितीचे माजी सभापती सुरेश धनके, मुक्ताईनगर लोकसभा क्षेत्र प्रमुख नंदकिशोर महाजन, माजी जिल्हा उपाध्यक्ष पद्माकर महाजन, माजी उपाध्यक्ष प्रल्हाद पाटील,जिल्हा सरचिटणीस हरलाल कोळी, माजी तालुकाध्यक्ष राजन लासुरकर, महेश चौधरी,पंचायत समितीचे माजी उपसभापती पी के महाजन, रावेर तालुका मंडळ अध्यक्ष दुर्गादास पाटील, राजेंद्र हरी चौधरी खिरवड, प्रल्हाद महाजन, राकेश पाटील, योगेश चौधरी, यशवंत पाटील उपस्थित होते. माजी आमदार अरुण पाटील यांच्यासह कृषी उत्पन्न बाजार समितीचे संचालक मंदार पाटील, जिल्हा परिषदेचे माजी अध्यक्ष मुरलीधर तायडे,माजी जिल्हा परिषद सदस्य आत्माराम कोळी, निंभोरा बुद्रुकचे माजी सरपंच सचिन महाले, शिंगाडीचे माजी सरपंच महेंद्र बगाडे, कांडवेल विविध कार्यकारी सहकारी सोसायटीचे चेअरमन सुरेश पाटील यांच्यासह समर्थकांनी भाजपमध्ये आज प्रवेश घेतला. 

हजारो कार्यकर्त्यांचा जळगावमध्ये होणार पक्षप्रवेश

आज मुंबईत भाजपच्या प्रदेश पक्ष कार्यालयात माजी आमदार अरुण पाटील यांनी वेळेअभावी मोजक्याच समर्थकांसह प्रवेश घेतला. मात्र हजारो कार्यकर्ते व समर्थकांचा प्रवेश सोहळा लवकरच जळगाव येथे आयोजित होणाऱ्या पक्षाच्या मेळाव्यात पक्षाच्या जेष्ठ नेत्यांच्या उपस्थितीत होणार आहे.